今次帶大家出黎食宵夜，呢間野都嚮敏捷城南面，叫木屋(墅）燒烤，同事話試過覺得ok，今次帶埋我過來食，等我試下係唔係真係咁正先？
（老規矩，影翻張靚仔相先）
價格基本上都係幾蚊一串，烤大魷魚或者大碟就十幾二十，藍妹啤酒一樽12蚊，總之就係好抵食。夜媽媽，訓唔著，黎呢度歎下。我地啱到，無乜人，坐咗一陣，全部Full曬，可能我地太早，肇慶年輕人夜晚都幾活躍喔。
呢間野總體裝修風格比較簡約，乾淨，有些許小特色咁，服務員都係後生仔，好熱情招待。
D食物上得好快,坐低5分鐘就有野食，熱辣辣香噴噴。
乾杯！辛苦曬大家！
之後好快就上齊食物，等我逐一介紹下。
（燒羊肉￥4一串，金針菇￥3一串，羊肉串肥瘦相間，咬落去有油脂B出來，好正，金針菇又好入味。）
（圓碌碌個條係叫麵筋￥3一串，烤韭菜￥2.5一串。麵筋韌韌地，又索到D燒烤汁，外脆內軟，燒韭菜唔知你地興唔興，嚮大陸，燒烤無韭菜，係無靈魂既！）
（燒蒜蓉台山蠔￥48/6隻，好新鮮，又嫩滑，一口一隻，下次叫多set先得。）
（哈爾濱啤酒￥10，食熱氣野，一定要配啤酒啦，就好似韓國人食炸雞配啤酒，鬼佬涼茶。）
（呢度有豬耳￥16.8/一扎，雞皮￥4/串。唔知大家有無食過豬耳，豬耳爽爽脆脆，真係好好食。雞皮經過高溫燒熟，油脂B曬出來，咬落去脆卜卜，又入味。）
（烤魚一盤成條江團魚￥98，重點介紹呢條魚，好鮮，應該係新鮮魚整既，師傅先燒後煮，所以連皮都好有味。食埋配菜，已經飽咗5成。98蚊，真係抵到爛。）
（燒蝦￥3/串/隻，蝦我就覺得麻麻地，不過鐘意食蝦既人可以試下，我就鐘意食白灼蝦既。）
最後四個人食到好飽咁走，都係200零蚊買單。係肇慶生活，D錢真係好似係泰國咁用。聽講佛山，廣州，附近一帶城市D人，放假都會首選肇慶消費，甚至買樓度假。肇慶衣食住行，其實同其他城市無乜分別，但係就可以用更少錢，得到更好既服務。我搵唔到理由唔黎肇慶囖。
下面係呢間野既地址，其實日頭想食都可以食，唔一定係宵夜。下面係具體地址電話，大家係肇慶玩或者生活，可以去試下。都係個句，我無收任何廣告費架。
想收看完整影片, 請上中軒Youtube頻道, 記得訂閱呀!